• A convocatoria, de concorrencia non competitiva, cubrirá as perdas de facturación entre o 28 de xullo e o 31 de agosto de 2025.

A Axencia Turismo de Galicia vén de activar unha nova liña de subvencións destinadas a compensar as perdas ocasionadas polas cancelacións de reservas nos establecementos de aloxamento turístico afectados polos incendios forestais do verán de 2025. Estas axudas tramítanse baixo o código de procedemento TU100C e concédense en réxime de concorrencia non competitiva.

O obxectivo principal é reparar o impacto económico sufrido por hoteis, casas rurais, apartamentos turísticos, campamentos e albergues situados nos concellos que estiveron en situación 2 do Plan de Emerxencias por Incendios Forestais de Galicia (Peifoga). Poderán acollerse aquelas empresas que acrediten perdas de facturación entre o 28 de xullo e o 31 de agosto de 2025 derivadas de cancelacións confirmadas durante ese período.

• Prazo de solicitude e tramitación

O prazo de presentación das solicitudes permanecerá aberto do 24 de outubro ás 08:00 h ata o 24 de novembro de 2025 ás 23:59 h. As solicitudes deberán formalizarse de maneira telemática a través da sede electrónica da Xunta de Galicia, introducindo o código do procedemento TU100C no buscador.

Estas subvencións forman parte do paquete de medidas impulsadas pola Xunta de Galicia para reactivar o sector turístico e apoiar ás empresas afectadas polos incendios, xunto con programas de promoción e incentivos á demanda en destinos afectados.

Para obter máis información, as persoas interesadas poden contactar co servizo de fomento da Axencia Turismo de Galicia no correo fomento.turismo@xunta.gal ou nos teléfonos 981 54 63 63 e 981 54 63 60.

Facebook

Twitter

Linkedin