Camiño Inglés

Aínda que a moi ampla distancia dos itinerarios favoritos dos peregrinos, que seguen sendo o Camiño Francés e o Portugués, o Camiño Inglés conseguiu sumar máis adeptos e situarse como o terceiro itinerario máis transitado no que vai de ano, por encima do Camiño Primitivo ou da vía da Prata.

Con máis de 1700 peregrinos nos que vai de ano, un 15% máis que o ano pasado, o Camiño Inglés tenta seguir gañando posicións entre os itinerarios elixidos por aqueles que fan o Camiño de Santiago, 41 mil no que vai de 2018. En 2017 un total de 11.300 peregrinos elixiron este itinerario, moi lonxe aínda das cifras do Portugués ou o Francés, que acaparan case o 80% dos peregrinos que se dirixen a Santiago.

Pero o incremento é evidente nos últimos anos, grazas ao labor de apoio e promoción das administracións públicas con accións como a mellora de infraestruturas, dotación de códigos QR, promoción da ruta nas distintas feiras de turism ou a campaña Primavera no Camiño Inglés, unha iniciativa promocional da Deputación da Coruña que se celebra nos 18 municipios da provincia coruñesa polos que transcorre esta ruta e que tivo o seu acto central na feira celebrada en Betanzos, epicentro desta ruta.

Xornadas
Por outra banda, Ordes, Narón, Culleredo (os días 15 e 16 de xuño) e Pontedeume acollerán unhas xornadas participativas de creación artística ao redor do do Camiño Inglés co título “Do Camiño Vivido”; mentres que Oroso, Carral, Cambre e Neda serán escenario da representación de “O Bululú nos Camiños de Santiago”, que interpretará o elenco da compañía Fuso Negro Teatro.