ayudas

A Xunta ampliou as axudas para este programa tras o éxito de solicitudes

O teu Xacobeo permitirá impulsar 352 iniciativas de dinamización en máis dun centenar de concellos de toda Galicia, despois de duplicar o orzamento destinado a este programa, que pasou de 2 a 4,7 millóns de euros e que permitirá mobilizar preto de nove millóns de euros en todo o territorio ao longo deste 2019 e até abril do 2020.

O conselleiro de Cultura e Turismo, Román Rodríguez, subliñou a “gran acollida? desta iniciativa, impulsada co obxectivo de implicar e fomentar a participación de todos os axentes da sociedade no deseño do próximo Xacobeo 21. De feito, Román Rodríguez destacou que se recibiron un total de 652 propostas no tres liñas de axuda abertas que abarcan un total de cinco áreas: o ámbito artístico, patrimonio-historia-pensamento-espiritualidade, gastronomía, ámbito deportivo e ámbito social.

No caso da primeira liña de axudas, destinada a proxectos formulados por entidades locais (concellos galegos, mancomunidades, consorcios locais ou deputacións), impulsaranse un total de 80 proxectos que contarán cun investimento de preto dun millón de euros. A maior parte destas iniciativas permitirán mobilizar recursos locais, fomentarán a innovación e o uso do TIC e farán especial énfase na promoción de artistas ou creadores galegos.

A segunda das liñas favorecerá a posta en marcha de 89 iniciativas propostas por pemes e particulares nas que se investirán preto de 1,5 millóns de euros en proxectos centrados no desenvolvemento rural, o impulso de talento emerxente ou o fomento da igualdade. Por último, a terceira das liñas permitirá que boten andar 183 propostas de entidades públicas ou privadas sen ánimo de lucro e contará cun orzamento de 2 millóns de euros. “Confiamos en que esta iniciativa sentará as bases dun Xacobeo que sintan como propio todos e cada un dos galegos”, recalcou Román Rodríguez.