A cifra de visitantes e noites pasadas en decembro triplicouse con respecto ao mesmo mes do 2020.

Os primeiros resultados turísticos totais do 2021 viñeron a confirmar a positiva evolución do sector en Galicia durante o ano pasado cun notable crecemento con respecto ao 2020 que permitiu á comunidade recuperar boa parte das cifras de visitantes e noites pasadas perdidas por mor da pandemia da  covid.

O último estudo de conxuntura turística hoteleira feito público polo Instituto Nacional de Estatística reflicte que o mes pasado foron algo máis de 200.000 os viaxeiros que pasaron polos hoteis galegos, o que supón case 4 veces máis que os 53.096 viaxeiros rexistrados en decembro do 2020 e queda xa moi preto dos 240.000 do mesmo mes de 2019. Estas cifras teñen tamén translación directa no número de noites pasadas, que creceron desde as 124.000 de decembro do 2020 ás 390.000 do mes pasado, reducíndose tamén de forma notable a diferenza coas 460.000 de decembro do 2019.

Desde a Xunta de Galicia destacan que os datos de decembro contribuíron a que Galicia superase nun 90 %, cun total de 3.134.000 visitantes no 2021, a cifra rexistrada no 2020, “só por detrás de Baleares no caso do volume de viaxeiros e só por detrás de Baleares e Cataluña no caso da demanda turística”. Así mesmo, os responsables autonómicos sinalan que en termos relativos Galicia situouse como a segunda mellor comunidade en canto á evolución das cifras hoteleiras de viaxeiros e noites pasadas con respecto ao 2019, ao recuperar o 70 % das cifras daquel ano, o que supón 22 puntos máis que a media nacional. Ademais, segundo os cálculos da Xunta, se a esas cifras súmanselle os datos dispoñibles (de xaneiro a novembro do 2021) dos establecementos extrahoteleiros, Galicia sumou o ano pasado máis de 4,1 millóns de visitantes rexistrados e case 9 millóns de noites pasadas.

Por provincias, a da Coruña liderou a táboa de visitantes aloxados en hoteis en Galicia durante o pasado mes de decembro con 84.033, seguida de Pontevedra con 75.452, Ourense con 21.025 e Lugo con 20.125. Ademais, Vigo fíxose un oco na clasificación estatal de puntos turísticos por número de visitantes durante o mes pasado ao rexistrar un total de 38.145 viaxeiros aloxados nos seus hoteis e algo máis de 74.000 noites pasadas. As Rías Baixas no seu conxunto (incluíndo tanto o territorio pontevedrés como o coruñés) fixeron o propio na clasificación estatal das zonas turísticas, con 75.618 visitantes e case 150.000 noites pasadas.

No total anual do 2021, a provincia da Coruña encabezou a táboa con 1,3 millóns de visitantes aloxados por diante de Pontevedra (1.044.000), Lugo (477.832) e Ourense (265.033). En canto ao número de noites pasadas nos hoteis, A Coruña sumou case 2,7 millóns, Pontevedra 2,5 millóns, Lugo algo máis de 800.000 e Ourense case medio millón.

Facebook

Twitter

Linkedin