• Rivadulla é presidente da Asociación Galega de Axencias de Viaxes (AGAVI) desde 2016.

O Consello Directivo da Confederación Española de Axencias de Viaxes (CEAV) nomeou a pasada semana a Juan A. Rivadulla como secretario xeral. Rivadulla, que preside a Asociación Galega de Axencias de Viaxes (AGAVI) desde 2016, é membro do Consello Executivo do Clúster Turismo de Galicia, así como do Consello de Turismo de Galicia, e dos Consellos de Turismo de Lugo e de Santiago.

Rivadulla releva a Jorge Moncada, que foi recentemente nomeado director xeral de Turismo e Hostalería do Gobierno de Aragón. O Clúster traslada os seus parabéns a Juan A. Rivadulla, que ata agora ocupaba unha vicepresidencia en CEAV.

Tras o seu nomeamento, Rivadulla sinalou que “é unha honra facerme cargo da secretaría xeral da confederación e achegar o meu gran de area. Son un firme defensor do asociacionismo e desde aquí loitamos polas axencias de viaxes en todos os ámbitos. Isto non sería non posible sen a unión e o traballo de todos”.

Sobre CEAV

CEAV é a Confederación Española de Axencias de Viaxes. Como aglutinadora das asociacións de axencias de viaxes, é a interlocutora válida ante a administración e outras entidades. Entre as súas funcións principais atópanse defender os intereses dos propios asociados, promover e conseguir o desenvolvemento do sector e favorecer as relacións entre os diferentes actores do sector turístico.

Foi constituída en 2005 e, tras un proceso integrador en 2011, conseguiu reunir á práctica totalidade das asociacións españolas de axencias de viaxes. Actualmente, aglutina a 28 asociacións empresariais nas que están integradas máis de 4.000 axencias de viaxes que contan con preto de 60.000 profesionais.  A Asociación está presidida por Carlos Garrido.

Facebook

Twitter

Linkedin