O Cabo Ortegal xa forma parte da rede mundial de xeoparques da Unesco. A candidatura, impulsada pola Asociación para a Xestión do Xeoparque do Cabo Ortegal e presentada no 2021, foi ratificada polo Consello Executivo da UNESCO a semana pasada.
Os auditores da Unesco visitaron a zona conformada polos municipios de Cariño, Cedeira, Cerdido, Moeche, Ortigueira, San Sadurniño e Valdoviño en agosto de 2022. Trala súa visita, os profesionais enxalzaron o patrimonio natural e cultural do terreo, destacando a riqueza xeolóxica da súa contorna. O territorio alberga rocas en superficie de máis de 490 millóns de anos e materiais que, normalmente, se atopan a máis de 70 quilómetros de profundidade.
A obtención deste distintivo, un selo ao mesmo nivel que o de Patrimonio da Humanidade, posibilita e incentiva a ampliación do coñecemento do territorio. A nivel mundial son 194 os xeoparques recoñecidos, dos cales 16 se atopan en España. O de Ortegal é o segundo territorio galego que recibe esta certificación trala declaración do Xeoparque Montañas do Courel no 2019.
Os xeoparques son sinónimo de turismo sostible e desestacionalizado, mesturando natureza con patrimonio, tradición, gastronomía e xeoloxía. O distintivo non é permanente, senón que se revisará cada 4 anos para comprobar que se cumpran os obxectivos de desenvolvemento, conservación, educativos, científicos, de dinamización territorial, de comunicación, etc.