• A internacionalización é un dos obxectivos da nova Estratexia de Turismo de Galicia 2030.

Galicia convértese nun dos destinos estrela da nova campaña internacional de Turespaña 2025, un proxecto que mostrará ao mundo a riqueza cultural, paisaxística e gastronómica de España a través dunha selección de territorios cunha identidade única.

O equipo de rodaxe estivo a semana pasada en Ourense, capturando a esencia da comunidade galega en enclaves emblemáticos. Un dos focos principais é o Entroido tradicional, con gravacións na Merca e Xinzo de Limia, onde se celebra un dos Entroidos máis representativos de España, declarado Festa de Interese Turístico Internacional. Estas imaxes formarán parte da promoción de Galicia como destino de interior, destacando a súa autenticidade, tradicións vivas e paisaxes singulares.

Ademais de Galicia, a campaña inclúe a outros territorios cun forte carácter propio, como as comunidades que conforman a España Verde (Asturias, Cantabria e Euskadi), así como Estremadura e Andalucía. A iniciativa responde a unha aposta por diversificar a imaxe de España no exterior, resaltando destinos menos masificados que ofrecen experiencias auténticas vinculadas ao patrimonio, a natureza e a gastronomía.

Esta campaña internacional busca atraer a un turismo de calidade, aliñándose coas tendencias dos viaxeiros que buscan experiencias diferenciadas e sostibles. Galicia, coa súa combinación de costa e montaña, a súa gastronomía recoñecida e o seu legado cultural, reforza así a súa posición no mapa do turismo internacional, mostrando ao mundo unha imaxe que vai máis alá do turismo convencional.

Facebook

Twitter

Linkedin