• O turismo internacional representa xa o 30% do total, cun notable aumento de visitantes de EE.UU. e Italia.

Galicia pechou 2024 con cifras récord no sector turístico, alcanzando os 8,2 millóns de visitantes, segundo datos publicados polo Instituto Nacional de Estatística (INE). Deles, preto de 7,3 millóns aloxáronse en establecementos hostaleiros e extrahoteleiros.

Destaca o crecemento tanto en volume de viaxeiros como na calidade da oferta turística, cun aumento na rendibilidade hostaleira e no gasto medio do visitante internacional, que se sitúa ao redor dos 170 euros, un 14,3% máis que en 2023.

O turismo estranxeiro continúa a gañar peso na comunidade, representando o 30% do total. Destacan os incrementos na chegada de viaxeiros procedentes de Estados Unidos (+22,1%), Italia (+11,8%) e Alemaña (+5%), consolidando a estratexia de internacionalización do destino.

Más pernoitas e unha maior estabilidade no sector

2024 tamén supuxo un novo récord en pernoitas, con máis de 13,6 millóns de noites rexistradas, o que supón 115.000 máis que en 2023. Ademais, o crecemento turístico segue  a avanzar na desestacionalización, con incrementos significativos en meses tradicionalmente menos concorridos, como maio (+11,1%) e novembro (+12,2%).

En termos económicos, a rendibilidade do sector hostaleiro galego experimentou un crecemento do 6,7%, alcanzando uns ingresos totais de 432 millóns de euros. Este dinamismo tamén se reflicte no emprego, cun incremento do 3,1% nas afiliacións á Seguridade Social e unha mellora na estabilidade laboral, con taxas de temporalidade en mínimos históricos.

Estes datos confirman a tendencia positiva do turismo en Galicia, que non só atrae a máis visitantes cada ano, senón que tamén avanza na súa diversificación e sustentabilidade, xerando un impacto económico e laboral cada vez máis sólido.

Facebook

Twitter

Linkedin