• O Consello de Turismo vén de declarar ao Concello de Muíños, en Ourense, como municipio turístico.
• A festa de San Antonio Ventureiro de Rigueira, de Xove, tamén foi declarada Festa de Interese Turístico de Galicia.

O Consello de Turismo de Galicia deu o visto e prace á declaración de Muíños como municipio turístico na sesión extraordinaria celebrada en Santiago de Compostela a semana pasada. O municipio iniciara a tramitación cinco anos atrás co obxectivo de incrementar a promoción dos seus recursos culturais, deportivos e patrimoniais.

A localidade ourensá forma parte da Reserva de Biosfera Gerês-Xurés e do Parque Natural Baixa Limia-Serra do Xurés, dous territorios cunha potente riqueza natural e cunha grande oferta turística sostible. A área recreativa do Parque Natural de Outeiro de Cela é un dos seus atractivos turísticos cunha superficie de 26 hectáreas, dúas praias fluviais, e zona boscosa.

Ademais disto, o pasado luns tamén se aprobou a declaración da festa de San Antonio Ventureiro da Rigueira, no municipio de Xove, como Festa de Interese Turístico de Galicia. Dita romaría celébrase cada 13 de xuño, coincidindo coa festividade que conmemora a morte de Santo Antonio de Padua. Centos de persoas visitan a parroquia da Rigueira de xeito anual para participar nesta histórica romaría.

Facebook

Twitter

Linkedin