• A tempada estenderase de marzo a outubro e combinará patrimonio, gastronomía e paisaxe nas catro provincias

Os Trens Turísticos de Galicia volven este 2026 cunha nova edición. Impulsados por Renfe en colaboración con Turismo de Galicia e Inorde, o programa ofrecerá 13 itinerarios temáticos entre marzo e outubro, dirixidos tanto a visitantes como ao público local.

Cada ruta integra desprazamento en tren, visitas guiadas e experiencias vinculadas ao territorio, configurando unha oferta que combina cultura, natureza e enogastronomía con acompañamento especializado.

• Rutas temáticas que percorren faros, mosteiros, rías e denominacións de orixe

O calendario inclúe propostas xa consolidadas como a Ruta da Camelia en Flor, a Ruta dos Faros, os percorridos pola Ribeira Sacra (Sil e Miño) ou a Ruta dos Mosteiros, xunto a experiencias centradas no viño (Rías Baixas, Ribeiro, Monterrei ou Valdeorras) e en produtos gastronómicos como a Ruta dos Queixos de Galicia.

Tamén destacan itinerarios que poñen en valor o patrimonio histórico e paisaxístico, como a Ruta das Mariñas, a Ruta polos Pazos e Xardíns Históricos, ou a experiencia dedicada a MEGA e A Coruña de 1906, que achega o turismo industrial ao visitante.

As saídas distribuiranse ao longo da primavera e o verán, estendéndose ata comezos de outubro. A primeira ruta dispoñible é a da Camelia en Flor, mentres que o resto iranse incorporando progresivamente ao calendario de venda.

• Un produto estratéxico para diversificar a oferta turística

Os Trens Turísticos consolídanse como unha ferramenta para a descentralización de fluxos, a posta en valor do medio rural e a promoción das denominacións de orixe galegas, integrando transporte, relato territorial e experiencia gastronómica nun mesmo paquete.

Facebook

Twitter

Linkedin