• A Xunta e SEGITTUR selan un acordo que reforza o uso de datos e tecnoloxía na planificación turística da comunidade

Galicia dá un paso máis na súa transformación como destino turístico intelixente coa firma dun protocolo de colaboración entre a Xunta e a Sociedade Estatal para a Xestión da Innovación e as Tecnoloxías Turísticas (SEGITTUR). Con este acordo, a comunidade incorpórase formalmente ao Sistema de Intelixencia Turística (SIT), unha ferramenta clave para fortalecer a toma de decisións baseadas en datos e consolidar un modelo turístico máis eficiente, sostible e conectado coas novas tecnoloxías.

• As vantaxes que o acordo supón para Galicia

Con esta alianza, Galicia poderá acceder á información que manexa o sistema e tamén contribuír con datos propios da súa actividade turística, reforzando así o coñecemento sobre a demanda, a rendibilidade do sector ou os fluxos de visitantes. Ademais, facilitarase a integración de novas tecnoloxías aplicadas á xestión do destino.

O protocolo tamén contempla o desenvolvemento dun plan de traballo conxunto centrado no impulso do modelo de Destinos Turísticos Intelixentes (DTI), así coma accións formativas dirixidas ao sector. A organización de seminarios e xornadas especializadas permitirá estender esta visión no ecosistema turístico galego, reforzando a capacitación dos profesionais.

Representantes das entidades participaron na firma do acordo, entre eles o director de Turismo de Galicia, Xosé Merelles; o director da Axencia para a Modernización Tecnolóxica de Galicia, Julián Cerviño; e o presidente de SEGITTUR, Enrique Martínez. Todos coincidiron en sinalar que este paso contribuirá a reforzar a planificación, mellorar a competitividade do sector e elevar a calidade da experiencia tanto para visitantes como para residentes.

Facebook

Twitter

Linkedin