Martín Códax foi designada como a Mellor Adega Aberta ao Turismo e o hotel Quinta de San Amaro recibiu unha das mencións especiais á Mellor Experiencia Enoturística.

A entrega oficial dos galardóns celebrarase o 17 de novembro no Auditorio do Museo Raíña Sofía de Madrid.

Galicia volve demostrar que ocupa un papel destacado no ámbito do enoturismo. Así o constatou a Asociación Española de Cidades do Viño (Acevin) a través dos premios bienais cos que o seu club de produto Rutas do Viño de Españarecoñece as mellores iniciativas desenvolvidas polos seus membros. Na lista de galardoados da súa sexta edición figuran dous establecementos galegos da Ruta do Viño Rías Baixas, a única das rutas galegas que forma parte desta asociación.

No acto oficial de entrega de premios, previsto para o próximo día 17 no Auditorio do Museo Raíña Sofía de Madrid, os representantes de Martín Códax recibirán o premio á Mellor Adega Aberta ao Turismo. Os integrantes do xurado encargados de decidir valoraron de Martín Códax “a extraordinaria adecuación enoturística dos seus espazos; a súa calidade e aposta pola sustentabilidade; a ampla gama de servizos e experiencias que oferta, renovados periodicamente e resaltando os valores e tradicións locais”. E tamén destacaron “o acertado enfoque na promoción e comercialización do enoturismo, utilizando recursos modernos, atractivos e de calidade, buscando todo tipo de públicos pero prestando especial atención aos mozos para involucralos e formalos na cultura do viño”.

O outro establecemento da Ruta do Viño Rías Baixas distinguido nesta sexta edición dos premios das Rutas do Viño de España é o hotel Quinta de San Amaro, que recibiu unha das dúas mencións especiais concedidas polo xurado na categoría de Mellor Experiencia Enoturística. A outra mención foi para Vintae Luxury Wine Specialist, da Ruta do Viño Rioxa Alta, mentres que o premio principal nesta categoría levoullo El Hilo de Ariadna, da Ruta do Viño de Rueda.

Preto dun centenar de propostas correspondentes a 24 das 36 entidades que forman parte das Rutas do Viño de España concorreron aos premios deste ano. Un xurado integrado por profesionais do ámbito da Administración, a universidade, o sector enolóxico e turístico, e os medios de comunicación especializados foi o encargado de valorar todas as propostas e decidir o destino dos galardóns.

Facebook

Twitter

Linkedin