• O Semáforo de Fisterra acolleu a semana pasada un acto de presentación no que participaron a conselleira de Política Social e Igualdade, Fabiola García, e o vicepresidente do Clúster, Jesús Picallo

O Carné +65 segue a ampliar a súa rede de establecementos adheridos en toda Galicia. Xa son preto de 900 os negocios hoteleiros que ofrecen vantaxes e descontos ás persoas maiores de 65 anos grazas a esta iniciativa da Xunta de Galicia, que busca promover o benestar deste colectivo á vez que impulsa a actividade económica, incluíndo o ámbito turístico.

Durante o acto celebrado o 23 de xullo no hotel O Semáforo de Fisterra, a conselleira de Política Social e Igualdade, Fabiola García, fixo entrega do distintivo oficial ao establecemento, que ofrece un 10% de desconto aos titulares do carné. A esta adhesión súmanse tamén o hotel Faro de Lariño (Carnota) e o Banco Azul (Fisterra).

Na cita participou o vicepresidente do Clúster Turismo de Galicia, Jesús Picallo, recibindo os distintivos como xerente do establecemento, e mostrando o seu apoio ao programa. Picallo (titular el mesmo do Carné +65) subliñou o valor estratéxico desta ferramenta, que permite ás persoas maiores acceder a condicións vantaxosas en aloxamentos, axencias de viaxe, comercios, centros de benestar ou servizos de lecer, entre outros.

• Unha iniciativa que beneficia ás persoas maiores e dinamiza o sector turístico

O programa, totalmente gratuíto, supera xa os 600.000 usuarios e prevé alcanzar os 1.000 establecementos adheridos antes de finalizar o ano. Os negocios interesados en sumarse a esta rede poden facelo a través da páxina oficial da iniciativa, na que tamén se pode consultar o seu funcionamento e os requisitos.

Facebook

Twitter

Linkedin