Sin categoría

César Ballesteros, secretario da entidade, participou nun encontro virtual sobre a dixitalización do sector

O Clúster Turismo de Galicia estivo presente no obradoiro para a dixitalización do sector organizado a través de Internet por Ineo, a Asociación de Empresas de Tecnoloxía de Galicia. César Ballesteros, secretario do Clúster, foi o encargado de presentar un relatorio no que debullou a estratexia que está a levar a cabo a entidade e os retos de futuro do sector no ámbito da dixitalización.

Ballesteros lembrou na súa intervención que o Clúster é nunha entidade de ámbito privado e sen ánimo de lucro que aglutina a preto de medio centenar de asociacións e a máis dunha vintena de empresas co obxectivo de potenciar a marca Galicia como destino turístico diferenciado a escala global. Entre os campos nos que está a traballar a entidade, destacou a potenciación de Galicia como destino en áreas como o turismo activo, o familiar e o enoturismo.

Con respecto aos retos de futuro do sector, Ballesteros referiuse á sustentabilidade, facendo fincapé na capacidade de Galicia para ser un lugar de referencia en canto a natureza, e á promoción e o avance no ámbito da internacionalización. A necesidade de traballar na área da innovación e a creatividade á hora de crear un produto turístico, así como o establecemento de sinerxías entre cultura e turismo, e o fomento da calidade para atraer a visitantes de maior nivel adquisitivo son outras das cuestións que o secretario do Clúster destacou na súa intervención.