Feiras

Os participantes poderán contactar con operadores turísticos nacionais e internacionais os días 2 e 3 de xuño no marco da feira que se celebrará en Silleda.

O Clúster Turismo de Galicia estará presente un ano máis en Turexpo Galicia, o Salón Turístico de Galicia, cuxa undécima edición celebrarase do 2 ao 5 de xuño no recinto da Feira Internacional Abanca Semana Verde de Galicia (Silleda). Como en ocasións anteriores a entidade que preside Cesáreo Pardal dispoñerá dunha caseta propia no que atender aos visitantes, dar a coñecer as súas actividades e difundir tamén as propostas dos seus asociados.

Ademais, o programa de Turexpo volve incluír unha bolsa de contratación turística que permitirá poñer en contacto aos representantes do sector galego cun nutrido grupo de operadores turísticos nacionais e internacionais. A bolsa de contratación, que se celebrará durante os dous primeiros días do salón (2 e 3 de xuño) é un dos principais atractivos da cita para os profesionais do mundo do turismo. Na edición de 2019, a última antes da pandemia, participaron medio centenar de operadores turísticos de 11 países diferentes e celebráronse case 3.000 reunións. Este ano, os organizadores de Turexpo esperan que este apartado do programa permita crear aínda máis alianzas comerciais.

O Clústerl dispón de 25 invitacións para participar na bolsa de contratación que pon ao dispor de todos os seus asociados e que serán asignadas por rigorosa orde de solicitude. Os interesados dispoñen de prazo ata o xoves 26 para presentar as súas solicitudes cubrindo o formulario correspondente e enviándoo por correo á dirección secretariatecnica@clusterturismogalicia.com

Festur 2022

Como en ocasións anteriores, no marco de Turexpo celebrarase tamén unha nova edición da Feira de Festas de Interese Turístico, Festur, un escaparate aberto ás numerosas celebracións de toda Galicia que foron recoñecidos con esta distinción. En Silleda poderán mostrar as particularidades que as converten en destinos ideais para gozar do turismo máis animado e lúdico.