As actividades propostas por concellos, empresas ou particulares difunden os valores do Camiño a través da arte, a música ou eventos sociais e culturais

 

Baixo o nome de “O Teu Xacobeo” celébranse en Galicia máis de 350 iniciativas de dinamización vencelladas co Xacobeo como antesala do próximo Ano Santo e que busca favorecer a participación e a descentralización do vindeiro Xacobeo 21. Máis dun cento delas espallaranse ata o remate de verán pola xeografía galega.

 

En conxunto, as propostas reflicten unha grande variedade de audiencias (publico xeral, mocidade, infancia, colectivos que precisan visibilidade, etc) e de temáticas (eventos sociais, culturais, deportivos ou que potencian a riqueza patrimonial). Un dos obxectivos do programa é que chegue ao maior número de concellos galegos, con especial atención aos máis pequenos, e que teña en conta os diferentes Camiños, que abranguen máis de 1.500 quilómetros en toda a nosa Comunidade, especialmente en municipios do rural.

 

En canto ás actividades dos concellos, ademáis das visitas teatralizadas (como é o caso de Padrón, Valdoviño, A Pobra do Caramiñal ou Boborás, entre outros) destacan as proxeccións ao aire libre como a que terá lugar na Pobra do Brollón; aplicacións de realidade aumentada, como a proposta do Concello da Fonsagrada; seminarios internacionais como o que organiza Catoira; divulgación científica na Veiga co seu proxecto Trevinca: o camiño as estrelas, ou andainas para escolares no Rosal e Lalín.

 

Estas actividades combinaranse con propostas gastronómicas, xornadas de convivencia entre peregrinos e veciños, accións sustentables ou que reforcen o compromiso do Camiño coa seguridade das mulleres que o fan soas, unha proposta impulsada polo Concello de Ribadeo .

 

En canto aos proxectos presentados por empresas galegas e entidades públicas ou privadas sen ánimo de lucro, destacan propostas para os máis pequenos como a creación das credenciais Pequegrino, para potenciar o Camiño Portugués ao seu paso pola localidade de Tui. Tamén o Peregrinamente, co impulso dos Camiños Francés, Primitivo, do Norte e de Inverno cunha aplicación ao estilo Trivial para os escolares, ou rutas a cabalo ou en patíns pola zona da Guarda.

 

No eido audiovisual, a mocidade pode participar este verán na realización dun vídeo Your own way, mentres que na comarca de Ferrolterra, O teu Xacobeo convoca unha peregrinación para milleiros de escolares da zona. Outro dos proxectos para o público máis cativo é o Camiño Portugués para nenos e nenas que conta con profesionais de distintos ámbitos (pintores, fotógrafos, etc) cos que os máis pequenos traballarán o Camiño.

 

Actividades dirixidas a diferentes colectivos

 

En canto a termos de inclusión de todos os colectivos que forman parte da sociedade galega O teu Xacobeo financia propostas como a da Fundación Menela, que organiza sete etapas do Camiño da Costa que gozarán unha vintena de adultos con TEA, mentres que a Asociación Bata fai o mesmo pero desde A Fonsagrada, O Cebreiro e Tui, coa axuda da aplicación Applicae no Camiño, para axudar ás persoas con espectro autista. Tamén Down Lugo impulsa experiencias no Camiño este verán.

 

Dentro da programación musical de O teu Xacobeo destaca o Festivaliño on the road, unha caravana con actividades para os máis pequenos que percorre durante 40 xornadas diferentes localidades galegas ou o Barbeira Fest de Baiona, co impulso da música feita en Galicia. Pola súa parte, o Festival Fisterra Film, no Semáforo de Fisterra, contará con artistas representativos dos Camiños Francés, Portugués e a Vía da Prata. O violoncello de Marc Coppey en Músicas no Camiño tamén forma parte da programación de verán ou Efecto Badalada, que se desenvolve en Guitiriz, Fisterra, Muxía, Chantada e Laza.

 

O teu Xacobeo tamén dá conta de moitas accións vinculadas ao teatro. Desde as visitas teatralizadas impulsadas polos concellos ata representacións como as de A Barraca Camiño a Compostela de Títeres Cachirulo, que vai facendo parada por 14 localidades do Camiño Francés ata chegar a Compostela, contando as aventuras das personaxes máis coñecidas e peregrinos máis salientables.

 

No eido deportivo a Xunta impulará a Costa Atlántica MTB tour que partirá de Bueu e discorrerá por toda a provincia de Pontevedra, ademais dunha proba deportiva automobilística en torno ao Xacobeo e o Campionato de Europa xuvenil de 420 e 470.

 

A espiritualidade tamén é unha temática desta programación, con encontros para reflexionar. É o caso de accións como Non só camiñamos, gozamos ou a que se desenvolverá na Illa de San Simón, Camiño cara a illa interior, centrado no Camiño como experiencia para a introspección, con actividades para pór en valor o patrimonio desa zona.

 

 

Enogastronomía

O patrimonio enogastronómico do Camiño concentra accións tan sobresaíntes como o proxecto Compostelata, impulsado por Anfaco-Cecopesca, no que os camiñantes selarán unha acreditación en distintas localidades do Camiño Francés onde se degustarán produtos en conserva galegos. A gastronomía tamén é a base para o proxecto que pretende impulsar a dieta atlántica vinculada aos itinerarios xacobeos (Camiño pola Costa).

16 de Agosto de 2019
O-teu-Xacobeo

Mais de cen actividades enmarcadas dentro do proxecto “O teu Xacobeo” terán lugar este verán en Galicia

  As actividades propostas por concellos, empresas ou particulares difunden os valores do Camiño a través da arte, a música ou eventos sociais e culturais   […]
15 de Agosto de 2019
termalismo

Avances no proxecto de Lei de aproveitamento lúdico das augas termais de Galicia

O proxecto de Lei de aproveitamento lúdico das augas termais de Galicia comeza a súa tramitación parlamentaria. A nova normativa é pioneira en España á hora […]
14 de Agosto de 2019
viviendas_turisticas Galicia

Crece a oferta de vivendas de uso turístico en Galicia, que alcanzan unha ocupación media en xullo do 70%

As vivendas de uso turístico creceron nos últimos meses en Galicia, chegando a un total de 9.075 segundo os datos do Rexistro de Empresas e Actividades […]
13 de Agosto de 2019
lugo

APEHL adianta unha previsión do 80% de ocupación media na provincia de Lugo para a ponte de Agosto

A Asociación Provincial de Empresarios de Hostalería e Turismo de Lugo ( Apehl) fixo públicos os datos de ocupación hoteleira na provincia durante o mes de […]